لە شاری کەرکووک کە بە دەوڵەمەندی مێژوویی و کولتوری ناسراوە، چەند کەسێکی دەگمەن هەیە کە کاری هونەری میناتۆری بکەن، یەکێک لەوانە گەنجێکی تورکمانی کەرکووکە بە ناوی ئیسرا سعود.
ئیسرا سعود، بە تێکەڵکردنی کولتور و بایەخەکانی تورکمان و شێوەکاری میناتۆری مۆدێرن، هەم کولتوورەکە بە زیندووی دەهێڵێتەوە هەمیش بە هونەرەکەی پەنجەرەیەک بەڕووی جیهاندا دەکاتەوە.
هونەرمەندی گەنجی میناتۆر، سەبارەت بە خولیای خۆی بۆ هونەری میناتۆر و ئەو سەختییانەی کە لەم بوارەدا ڕووبەڕووی دەبێتەوە و ئامانجەکانی داهاتووی خۆی بۆ تەبا دوا.
بەرهەمەکانی ئەو هونەرمەندە گەنجە نەک تەنها بە جوانییە سەرنجڕاکێشەکانیان بەڵکو بە مانا قووڵەکانیشیان ئیلهامبەخشن. چیرۆکی ئیسرا نموونەیەکی ئومێدبەخش دەخاتەڕوو کە چۆن دیدگای هونەری کچانی تورکمان دەتوانێت گەشە بکات.
ئیسرا سعودی تەمەن ٢٥ ساڵ کە دەرچووی بەشی کارگێرییە، سەبارەت بە پیشەکەی وتی،”دوای تەواوکردنی خوێندنەکەم کە هاوکات بوو لەگەڵ سەردەمی پەتای کۆڕۆنا، سەرەتا دەستم کرد بە وێنە کێشان. پاشان دەستم بە هونەری میناتۆر کرد”.
ئاماژەی بەوەشدا، زۆر بە باشی چاودێری دەوروبەرەکەی دەکات و سەرنجی وێنە باوەکان دەدات، دەشڵێت، “حەز لە سەیرکردنی بەرنامەکانی تەلارسازی و دیزاین دەکەم و ئیلهامم پێدەبەخشن”.
ئەو هونەرمەندە گەنجە بە ئاماژەدان بەو کەرەستانەی کە پێویستن هونەری میناتۆر، وتی، “ماددەی سەرەکی لە هونەری بچووکدا دارە. جگە لەوەش چەسپ و کەتەریش پێویستە. هەروەها لە هەمووی گرنگتر کەرەستەی بۆیاخە”.
دەربارەی پرۆسەی دروستکردنی میناتۆرێک، ناوبراو ڕایگەیاند، “سەرەتا ئەو بەرهەمە لە مێشکمدا دیزاین دەکەم کە دەمەوێت دروستی بکەم. ئەمە دەکرێت هۆڵێک، کتێبخانەیەک، یان بینایەک بێت. پاشان، لەسەر پەڕەیەک وێنەی ئەو دیزاینە دەکێشم کە لە مێشکمدا ئامادەمکردووە. دوای گرتنەبەری پێوانەکان، بیر لەوە دەکەمەوە کە دەکرێت لەناو ژووری میوان یان کتێبخانە چیتر هەبێت و دوای دیزاینکردنیان، دواتر پرۆسەی دروستکردنی بیناسازی دەستپێدەکات کە ٢٠ بۆ ٣٠ رۆژ دەخایەنێت”.
ئیسرا باسی لە لە میناتۆرە دڵخوازەکەی کرد و وتی، “یەکێک لە میناتۆرە دڵخوازەکانی من ئەو مینیاتۆرە بوو کە بۆ ئەو خانووە دیزاینم کردبوو کە دایکم لە منداڵیدا تێیدا ژیاوە. کاتێک دایکم باسی ئەو خانووەی بۆ کردم، بیرم لێکردەوە و دیزاینم کرد. ئەو میناتۆرەی زۆرترین کاریگەری لەسەرم هەبوو لەکاتی دروستکردنیدا ئەو خانووە بوو کە پێشتر دایکم تێیدا ژیانی کردووە”.
سەبارەت بە سەختییەکانی هونەرەکەش وتی، “ئەو سەختییانەی کە ڕووبەڕووم دەبنەوە، بێگومان دۆزینەوەی کەرەستەیە. هەندێک جار تەنانەت سادەترین کەرەستەکانیش زۆر بە زەحمەت دەدۆزمەوە. بەو پێیەی ئەم هونەرە زۆر بەناوبانگ نییە، پشتگیرییەکی کەممان بۆ هەیە. خەڵک بە تەواوی لێی تێناگەن، بۆیە من لەم بابەتە توشی زەحمەتیی دەبم”.
سەبارەت بە نمایشکردن یان هاوبەشکردنی میناتۆرەکانی خۆی، هونەرمەندی میناتۆر وتی، “بۆمن خۆشە کە خەڵک بمناسێت. کەسانێک هەبوون کە بانگهێشتیان دەکردم بۆ ئەوەی لە پێشانگاکان بەرهەمەکانم نمایش بکەم. هەندێک جار لەم بوارەشدا پارەم دەست دەکەوێت و ئەمەش دڵخۆشم دەکات”.
ناوبراو تیشکی خستەسەر هونەری میناتۆر لە عێراق و ڕایگەیاند، “من نەمتوانی ئەم هونەرە لە عێراق ببینم، بەڵام لە ژاپۆن کەسانێکی زۆر هەن لەم هونەرەدا کار دەکەن و پێگەی باشیان بەدەستهێناوە. یەکێک لە کارەکانی ئەوان ئەوەیە کە دیمەنە گەورەکان نمایش دەکەن بە گۆڕینی بۆ میناتۆرە بچووکەکان، ئەمەش زۆر کاریگەریم لێدەکات”.
لە کۆتاییدا بە ئاماژەدان بەوەی کە ئامۆژگارییەکەی بۆ ئەو کەسانەی دەیانەوێت ئەم هونەرە دەستپێبکەن ئەوەیە کە تێبینی زۆر بکەن و شوێن هونەرمەندە گەورەکان بکەون. ئیسرا سعود وتیشی، پلانی داهاتووم بریتییە لە نمایشکردنی بەرهەمە مێژووییەکانی کەرکووک بە شێوەی میناتۆر.
