مەسعود بارزانی رایگەیاندووە، بۆ ئەوەی شەرعیەت لە هەرێمی كوردستان نەخرێتە ژێر پرسیار، پێویستە ئەمساڵ هەڵبژاردن بكرێت. لەبارەی شێوازی بەشداریکردنی پێکهاتەکانیش لە هەڵبژاردنی پەرلەمانی کوردستان-عێڕاق وتی: “نابێت هیچ دەستوەردان لە مافی پێكهاتەكاندا بكرێت.”
ئەمڕۆ شەممە، 18-03-2023، مەسعود بارزانی، سەرۆکی پارتی دیموکراتی کوردستان لە سەلاحەددین میوانداریی ژمارەیەكی زۆر لە باڵیۆز، كۆنسوڵ، نوێنەرایەتیی وڵاتان، رێكخراوە نێودەوڵەتییەكان و هێزی هاوپەیمانان لە عێراق و هەرێمی كرد و نیوەڕۆخوانێكی بۆ سازكردن.
بە گوێرەی راگەیەندراوی بارەگای بارزانی، “لە میواندارییەکەدا سەرۆک بارزانی گوتەیەکی پێشکێشکردووە لەبارەی پەیوەندییەکانی هەرێمی کوردستان و عێراق، هەڵبژاردنی پەرلەمانی کوردستان و سەردانی هەفتەی رابردووی سەرۆکوەزیرانی عێراق بۆ هەرێمی کوردستان، هاوکات وێڕای ئاماژەدان بە بایەخی هێما و مانا و بۆنەكانی مانگی ئادار و نەورۆز بۆ گەلی كوردستان هیوای ئەوەی بۆ خواستن كە لە رۆژانی جەژن و پشوودا كاتێكی خۆشیان لە كوردستان هەبێت”.
لەبارەی دۆخی سیاسی و پەیوەندییەكانی نێوان حكومەتی فیدراڵیی عێراق و حكومەتی هەرێم؛ مەسعود بارزانی ئاماژەی بەوەکردووە، “دەرفەتێكی باش بۆ چارەسەركردنی كێشەكان لە ئارادایە و ئیرادە و خواستێكیش دەبیندرێت بۆ ئەوەی كێشەكان بە لێكتێگەییشتن و بە پشتبەستن بە دەستوور و لەسەر بنەمای ئەو رێككەوتنانە چارەسەربكرێن كە لەنێوان لایەنە پێكهێنەرەكانی هاوپەیمانێتیی ئیدارەی دەوڵەت بەستراوە.”
مەسعود بارزانی ئەو سەردانەی سەرۆکوەزیرانی عێراقی بە دەرفەتێکی باش زانیوە بۆ لێکتێگەییشتنی زیاتری نێوان هەرێمی کوردستان و حکومەتی فیدراڵیی عێراق.
لەبارەی هەڵبژاردنی خولی شەشەمی پەرلەمانی کوردستان-عێراق و بەشداریکردنی پێکهاتەکان مەسعود بارزانی وتی: “بۆ ئەوەی شەرعیەت لە هەرێمی كوردستان نەخرێتە ژێر پرسیارەوە پێویستە ئەمساڵ هەڵبژاردن بكرێت و نابێت هیچ دەستوەردانێک لە مافی پێكهاتەكاندا بكرێت، ئیرادە و سیخەیەكی دیاریكراو بەسەر پێكهاتەكانی هەرێمی کوردستان بسەپێندرێت.”
مەسعود بارزانی وتیشی: “دەبێت رێز لە ئیرادەی پێكهاتە ئایینی و نەتەوەییەكانی كوردستان بگیرێت و خودی پێكهاتەكان و رێكخراوی نەتەوە یەكگرتووەكان هەر سیستەمێک بۆ بەشداریكردنی پێكهاتەكان بە باش بزانن بەلای ئێمەشەوە پەسەند دەبێت.”
بە وتەی بارزانی، تیمە نێودەوڵەتییەکانیش هاوکاری و هەماهەنگییەکی باش بۆ لایەنە پەیوەندیدارەکانی هەرێمی کوردستان دەکەن بۆ ئامادەكارییەكانی هەڵبژاردنەكانی هەرێمی كوردستان.
بەگوێرەی بارەگای بارزانی، هەر لەو كۆبوونەوەیەدا دەرگەی گفتوگۆ و ئاڵوگۆڕی بیروڕا بۆ ئامادەبووان كرایەوە و سەرۆك بارزانی وەڵامی تێبینی و پرسیاری دیپلۆماتكار و نوێنەرانی وڵاتانی بیانیی سەبارەت بە بارودۆخی سیاسیی عێراق و هەرێمی كوردستان دایەوە.
1
مەرجەکانی وەرگرتن لە کولێژی سەربازی ئاشکرا دەکرێت
2
خشتەی تاقیکردنەوەی نیشتمانی بۆ پۆلی 9ـی بنەرەتی راگەیەندرا
3
وەزارەتی خوێندنی باڵا رێنمایی بۆ خوێندنی دیپلۆمی باڵا، ماستەر و دکتۆرا دەردەکات
4
“ژیانی کەم ئەندامان لە کوردستان یەکسانە بە دۆزەخ”
5
یەکەم تابلۆی ئۆتۆمبێل لەسەر سیستەمی نوێ لە سلێمانی چاپ کرا
