بەڕێوەبەرایەتی پۆلیسی هەولێر(ئەربیل) لە راگەیەندراوێکدا ئاماژەی بەوەکردووە، ئەو تاوانبارەی لە کاتی گواستنەوەیدا لە دەستی هێزە ئەمنییەکان رایکردبوو، دەستگیراوە.
دەقی راگەیەندراوەکەی پۆلیسی هەولێر:
راگەیەندراوێک له بەڕێوەبەرایەتی پۆلیسی پارێزگای هەولێر
لە ڕێکەوتی (٢٥-٨-٢٠٢٢) تاوانبارێک به ناوی(ئەحمەد سالار مامند) له کاتی گواستنەوەيدا لەدەستی هێوزه ئەمنیەکان رایکرد و خۆی حەشاردا.
دوای بەدواداچوونی تیمەکانی ژووری ئۆپەراسیۆنی هاوبەش کە پێک هاتووه له بەڕێوەبەرایەتیەکانی دژه تيرۆر و ئاسایشی هەولێر و پۆلیسی هەولێر، توانرا شوێنی تاوانبار دەست نیشان بکرێت و له ئۆپەراسیۆنێکی تایبەتدا بەره بەیانی ئەمڕۆ (۲۰۲۲/۹/۱) تاوانبار دەستگیرکرايەوە و لەگەڵ دوو تاوانباری تر، به ناوەکانی( م . و . ن ) و ( هـ . و . ن) که هەڵسابوون به شاردنەوەی تاوانبار لەلای خۆیان، تاوانباران رادەستی یاسا کران.
هاووڵاتیانی خۆشەویستی شاری هەولێری پایتەختی هەرێمی کوردستان دڵنیادەکەینەوه که هیچ تاوانبارێک ناتوانێت لەدەستی یاسا رابکات و هەموومان له خزمەتی ئارامی و سەقامگیری شاری هەولێرین بۆ پاراستنی سەروماڵی هاووڵاتیان، بەردەوام دەبين.
راگەیاندنی بەڕێوەبەرایەتی پۆلیسی پارێزگای هەولێر
١-٩-٢٠٢٢