سەرۆکوەزیرانی هەرێمی کوردستانی عێراق پەیامێکی لەبارەی دۆخی عێراق بڵاوکردەوە و دەڵێت، “کاتی ئەوە هاتووە دیالۆگێکی هەمەلایەنە و راشکاوانە بکرێت سەبارەت بەو پرسە قووڵ و مەترسیدارانەی کە وڵات رووبەڕووی دەبێتەوە”.
مەسرور بارزانی، سەرۆکوەزیرانی هەرێم پەیوەندیی لەگەڵ مستەفا کازمی، سەرۆکوەزیرانی عێراق ئەنجامداوە و پەیامێکی سەبارەت بە دۆخی عێراق بڵاوکردووەتەوە.
دەقی پەیامەکەی سەرۆکوەزیرانی هەرێم:
زۆر نیگەرانم لە هەڵگیرسانی گەڕێکی دیکەیی توندوتیژی لە عێراق. لەگەڵ مستەفا کازمی، سەرۆکوەزیرانی فیدراڵ قسەم کرد و ئامادەیی حکومەتی هەرێمی کوردستانم بۆ یارمەتیدان لە گەڕاندنەوەی ئاشتی و سەقامگیری بۆ هەموو وڵات دەربڕی.
کاتی ئەوە هاتووە دیالۆگێکی هەمەلایەنە و راشکاوانە بکرێت سەبارەت بەو پرسە قووڵ و مەترسیدارانەی کە وڵات رووبەڕووی دەبێتەوە. دەبێت ئەوەندە ئازابین دان بە جیاوازییەکانی یەکتر بنێین و قبووڵ بکەین کە ئەو دۆخەی ئێستا هەموومان خۆمانی تێدا دەبینینەوە، پێویستی بە چارەسەرێکی هەمیشەیی هەیە.