دەزگای ئاسایشی نیشتمانی لە پارێزگای میسان رایگەیاند، تۆڕێکی بازرگانیکردن بە ماددە هۆشبەرەکان بە 15 کیلۆگرام ماددەی کریستاڵ دەستگیرکران.
دەزگاکە لە بەیاننامەیەکدا ئاشکرای کردووە، “دوای بەدەستگەیشتنی زانیاری دروستی هەواڵگری و وەرگرتنی رەزامەندی دادگە، مەفرەزەکانی ئەمنیی میسان لە ئۆپەراسیۆنێکدا توانیان یەکێک لە بازرگانە هەرە گەورەکانی ماددە هۆشبەرەکان لە پارێزگاکە دەستگیربکەن لەگەڵ دەستبەسەرداگردتنی 14 کیلۆگرام ماددەی کریستاڵ و کیلۆگرامێک ماددەی حەشیش”.
ئەوەشی هاتووە، “دوای لێپێچینەوە توانرا چوار لە ئەندامانی تۆڕەکە کە کاریان دابەشکردنی ماددەی هۆشبەر بوو لە پارێزگاکانی نەجەف و کەربەلا دەستگیربکەن و دەست بەسەر 13 ملیۆن دیناری عێراقیشدا بگرن”.
جێی باسە، ئەندامانی تۆڕەکە رادەستی لایەنی یاسایی تایبەت بە کەیسی ماددەی هۆشبەر کراون و لێکۆڵینەوەش لەگەڵیاندا بەردەوامە.