ئۆلیکساندەر مۆتوزیانیک، وتەبێژی وەزارەتی بەرگریی ئۆکراینا رایگەیاند سوپای رووسیا لە ماوەی ٢٤ کاتژمێری رابردوودا ٤٨ ھێرشی ئاسمانی کردووەتەسەر ناوچەکانی خارکێڤ و دۆنێتسک.
مۆتوزیانیک، لە میانی کۆنگرەیەکی رۆژنامەوانیدا لە کیێڤ-ی پایتەخت زانیاری لەسەر جەنگی نێوان ئۆکراینا و رووسیا کە ماوەی دوو مانگە بەردەوامە، بڵاوکردەوە.
وتەبێژی وەزارەتی بەرگریی ئۆکراینا، ئاماژەی بەوە کرد کە ھێرشەکانی سوپای رووسیا بۆسەر وڵاتەکەی بەردەوامە. وتیشی “جەختی سەربازانی رووسیا بە ئاراستەی دۆنێتسک و سلۆبۆژانسک دەبینرێت. لە ماوەی ٢٤ کاتژمێری رابردوودا ٤٨ ھێرشی ئاسمانی بۆسەر ناوچەکانی خارکێڤ و دۆنێتسک ئەنجامدراوە. جگە لەوە، پێنج ھێرشی ئاسمانی کراوەتە سەر پێگەکان لە ناوچەکانی مکۆلاییڤ و ئۆدێسا”.
ئۆلیکساندەر مۆتوزیانیک، سەرنجی بۆ ئەوە راکێشا کە رووسیا ھەڕەشەی بەکارھێنانی چەکی زۆر ھەستیار لە دەریای رەشەوە بۆسەر ئامانجە سەربازیی و مەدەنییەکانی خاکی ئۆکراینا دەکات و باسی لەوە کرد کە ھێرشەکانی ھێزە سەربازییەکانی رووسیا بۆسەر ژێرخانی مەدەنی و ئەو ناوچانەی کە خەڵکی مەدەنی تێدا دەژێن لە ئۆکراینا بەردەوامە.
راشیگەیاند “ئیدارەی رووسیا، ھەنگاوەکانی بە ئاراستەی لکاندنی ئەو خاکانەی کە داگیریکردوون زیادکردووە. رووسیا، بەردەوامی بە ئۆپەراسیۆنەکانی دەدات بۆ بەرەوپێشچوون لە رۆژھەڵاتی ئۆکراینا. ئامانجیان سەپاندنی دەسەڵاتی تەواوە بەسەر خاکی ناوچەکانی دۆنێتسک، لوھانسک و ھەرسۆنە و دابینکردنی رێرەوێکی وشکانیی کاتییە لە کریمیای داگیرکراوەوە”.
1
گۆڕانکاری کۆیلایەتی لە رابردووەوە تاوەکو ئەمڕۆ
2
بەربەستەکانی دەوروبەری کەعبەی پیرۆز لادەبرێن
3
ئەمریکا: ژنانی ئێران تەنها لە پێناوی شکۆی خۆیاندا خۆپیشاندان دەکەن
4
پاکستان… لە رووداوێکی هاتووچۆدا نزیکەی 60 کەس بوونە قوربانی
5
نیگەرانییەکانی بەدەستهێنانی وزە لە ئەوڕووپا بەردەوامە و وڵاتەکان چ رێوشوێنێکیان گرتووەتەبەر؟
