مەسرور بارزانی و ئەردۆغان لە ئەنقەرە کۆدەبنەوە

0

لایک

0

مەسرور بارزانی، سەرۆکی حکومەتی هەرێمی کوردستان-عێراق سەردانی تورکیا دەکات و لەگەڵ ڕەجەب تەیب ئەردۆغان سەرۆککۆماری تورکیا لە ئەنقەرە کۆدەبێتەوە.

ماڵپەڕی فەرمیی سەرۆکایەتیی کۆماری تورکیا رایگەیاند، کاتژمێر 14:00ـی پاشنیوەڕۆی ئەمڕۆ سێشەممە، 7ی کانوونی دووەمی 2025، رەجەب تەیب ئەردۆغان لە کۆشکی سەرۆکایەتیی کۆمار لە ئەنقەرە پێشوازی لە مەسرور بارزانی، سەرۆکی حکومەتی هەرێمی کوردستان-عێراق دەکات.

سەرۆکی حکومەتی هەرێمی کوردستان-عێراق بەر لە دیداری لەگەڵ ئەردۆغان، کاتژمێر 12:00 سەردانی وەزارەتی دەرەوەی تورکیا دەکات. لەبارەی ئەجێندای کۆبوونەوەکان هیچ زانیارییەکی فەرمی بڵاونەکراوەتەوە.

مەسرور بارزانی، سەرۆکی حکومەتی هەرێمی کوردستان-عێراق دوایین جار لە 20ـی حوزەیرانی 2023 لە چوارچێوەی سەردانێکی فەرمیدا بۆ تورکیا لەگەڵ رەجەب تەیب ئەردۆغان سەرۆککۆماری ئەو وڵاتە کۆبووەوە.