شاندێکی هەرێم بۆ چارەسەرکردنی كێشەی كەمئاوی لە هەولێر دەچێتە سعودیە
شاندێکی پارێزگای هەولێر ئەمڕۆ سێشەممە سەردانی شانشینی عەرەبی سعودیە دەکات بەمەبەستی ئاڵوگۆڕی بازرگانی و گەیاندنی كێشەی كەمئاوی و دۆزینەوەی چارەسەر بۆ رزگاركردنی هەولێر لەو قەیرانەی ساڵانە لەوەرزی هاویندا بەخۆیەوە دەبینێت.
پارێزگای هەولێر لە راگەیەندراوێكدا بڵاویکردوە، ئەمڕۆ شاندێکی پارێزگای هەولێر بە سەرۆکایەتی ئومێد خۆشناو پارێزگاری هەولێر و ئەندامێتی جێگری پارێزگار و بەڕێوەبەری گشتیی ئاو و ئاوەڕۆی هەرێم و بەڕێوەبەری ئاو و ئاوەڕۆی هەولێر و ژماریەکی تر لە وەبەرهێنەر و پیاوانی کار سەردانی دەکات.
باسی لەوەشکردوە "ئامانجی سەردانەكە بۆ ئاڵوگۆڕی بازرگانی، وەبەرهێنان و چارەسەرکردنی کێشەی ئاوی خواردنەوەی هەولێر و سوود وەرگرتنە لە ئەزمونی سعودیە".
ئەوەشی روونكردۆتەوە، شاندەكەی هەولێر لەسەردانەكەیدا بۆ سعودیە، لەگەڵ وەزیری بازرگانی، وەزیری وەبەرهێنان، ئەمیری ریاز و نوێنەرانی کۆمپانیا سعودییەکان کۆدەبێتەوە".
هەر بەگوێرەی راگەیەندراوەكە، شاندەکەی پارێزگای هەولێر چوار رۆژ لە سعودیە دەمێننەوە و هانی کۆمپانیا سعودییەکان دەدەن بۆئەوەی وەبەرهێنان بهێننە هەولێر و هەرێم.