لایک
سەرۆکوەزیرانی عێراق ڕایگەیاند، بەردەوام دەبین لە ناردنى پارەى مووچە بۆ مانگەکانى داهاتوو بەشێوەیەکى رێکوپێک بۆ هەرێمی کوردستان-عێراق و دەشڵێت، “ئومێدەوارین بەمنزیکانە هەناردەى نەوتى هەرێمى کوردستان-عێراق دەستپێبکاتەوە”.
محەممەد شیاع سوودانى لە چاوێکەوتنێکیدا لەگەڵ کەناڵى شەرق ئاماژەى بەوەدا، پرسى مووچەى فەرمانبەرانى هەرێمى کوردستان-عێراق بە بودجەوە بەستراوەتەوە لە رێگەى وەزارەتى دارایی فیدڕاڵەوە، بە گوێرەى بڕیارى دادگەى باڵاى فیدڕاڵى و میکانیزمێک بۆ بەجێکردنى مووچە و رادەستکردنى داهات دیاری کراوە. کێشەى تەکنیکى هەبووە و بەم دواییە تێپەڕێنرا و مووچەى مانگى کانوونى دووەم نێردرا.
محەممەد شیاع سوودانى رایگەیاند، بە رووحى هاوبەشی و هاریکاری، توانیویانە چەندین خاڵى ناکۆک لەگەڵ هەرێمى کوردستان-عێراق تێپەڕنن. جەختى کردەوە کە ئەوەى پەیوەندارە بە دۆسیەى مووچەوە کێشەى تەکنیکییە نەک هەڵوێستێکى سیاسىیی بەغداد.
سەرۆکوەزیرانى عێراق ئاماژەى بەوەدا، بەردەوام دەبن لە ناردنى پارەى مووچە بۆ مانگەکانى داهاتوو بەشێوەیەکى رێکوپێک بەو ئومێدەى لەو ماوەیەدا تێبینییەکانى دیکە لەبەرچاو بگیرێن کە وەزارەتى دارایی فدراڵ دیاری کردووە.
سوودانى رایگەیاند، “دواى ئەو هەموارە، ئومێدەوارین بەمنزیکانە هەناردەى نەوتى هەرێمى کوردستان-عێراق دەستپێبکاتەوە”.
سەرۆکوەزیرانى عێراق وتى، گازمان دەسووتاند و گازمان لە دەرەوە هاوردە دەکرد، ئەمە بە فیڕۆدان و قورساییەکى زۆر بوو لەسەر بودجە. “کێشە بنەڕەتییەکە ئەوەیە کە گاز هاوردە دەکەین، هاوردەکردنى گازى ئێران دەمانخاتە بەردەم زۆر پرسى دیکە، لەوانە گازى ئێران بەشێکە لە وانەى سزاى ئەمریکاى لەسەرە و ناتوانرێت شایستە دارایییەکەى بدرێت”.
سەرۆکوەزیرانى عێراق رایگەیاند، کاریان لەسەر تیپەڕاندنى ئەو کێشەیە کردووە و لەرێگەى گرێبەستکردن لەگەڵ چەند کۆمپانیایەک بۆ ئەوەى تاوەکو ساڵى 2028 هاوردەکردنى گاز لە ئێران رابگرن.
لەبارەى دۆخى سوریا سوودانى رایگەیاند، هەماهەنگی لەگەڵ سووریا دەکەن لەبارەى پاراستنى سنوور و گەڕانەوەى ئاوارەکان و ئامادەى پێشکێشکردنى هاوکارین. وتیشی، “نامانەوێت سووریا ببێتە وێستگەیەک بۆ ململانێى بیانى و هەڵوێستێکى روونمان لە ئیدارەى نوێى سووریا دەوێت لەبارەى دژایەتیکردنى داعش و سنووربەزاندنى ئەو وڵاتە لەلایەن ئیسرائیلەوە.”
ڕۆژی 4 شوبات، 2025، وەزارەتى دارایی فیدراڵ بڕیارى خەرجکردنى زیاتر لە یەک تریلیۆن دینارى مووچەى مانگى کانوونى دووەمى ئەمساڵى هەرێمى کوردستان-عێراقی دەرکرد، دواى ئەوەى شاندى هەردوولا رێککەوتن لەبارەى ئەو کێشانەى لە نێوانیان بە هەڵپەسێردراوى مابوونەوە.
پەرلەمانى عێراق، رۆژی 2ـى شوباتى 2025، هەموارى یاسای بودجەى پەسەندکرد کە تایبەت بوو بە بەرهەمهێنان، گواستنەوە و رادەستکردنی نەوتی هەرێمی کوردستان، کە 16 دۆلاری وەکو تێچووی بەرهەمهێنان و گواستنەوەى بەرمیلێک نەوت دیاریکردووە، تاوەکو ئەو کاتەى لایەنێکى نێودەوڵەتیی راوێژکاری، نرخێکى خەمڵێندراو دیاری دەکات، دەبێت هەرێمى کوردستان رۆژانە 400 هەزار بەرمیل نەوت رادەست بکات.
