لایک
بە بڕیاری حكوومەتی هەرێمی كوردستان – عێراق یاریگەی شەهید فڕەنسۆ هەریری نۆژەن دەكرێتەوە و وەك قۆناغی سەرەتا و بەپەلەش چیمەنی یاریگاكە دەگۆڕدرێت.
ئەمرۆ سێشەممە ئومێد خۆشناو پارێزگاری هەولێر سەردانی یاریگای شەهید فەڕەنسۆ هەریری کرد و لە نزیکەوە لەگەڵ ڕاهێنەری یانەی هەولێر و ئەندامانی دەستەی کارگێڕی و یاریزانانی یانەکە، بە دواداچوونی بۆ چۆنیەتی گۆڕینی چیمەنی یاریگاکە کرد وەک قۆناغی یەکەم کە چاوەڕێ دەکرێت لەم نزیکانە دەست پێ بکرێت.
ئومێد خۆشناو ڕایگەیاند، وەک قۆناغی یەکەم، چیمەنی یاریگای شەهید فەڕەنسۆ هەریری دەگۆڕدرێت و لە قۆناغی تریشدا تەواوی یارگاکە نۆژەندەکرێتەوە
پارێزگاری هەولێر وێڕای دەستخۆشی لە یاریزانان و ڕاهێنەر و سەرۆکی یانە و ئەندامانی دەستەی کارگێڕی، دڵخۆشی خۆی بە ئەنجامەکانی یانەی هەولێر لە خولی ئەستێرەکانی عێراق نیشان دا و هیوای سەرکەوتنی زیاتری بۆ خواستن و هەموو پاڵپشتی و هاوکارییەکی خۆشی بۆ سەرکەوتنی یانەکە دووپات کردەوە.
یاریگای شەهید فڕەنسۆ هەریری لە ساڵی 2009 بووەتە یاریگایەکی نێودەوڵەتی، ئێستاش ئەو یاریگایە بووەتە بەشێکی دیار و بەرچاو لە مێژووی ھەولێر.
هاوکات یاریگای شەھید فەڕەنسۆ ھەریری یاریگایەکی نێودەوڵەتی یانەی ھەولێرە و بە دووەم گەورەترین یاریگای وەرزشی لە عێراق دادەنرێت، لە ساڵی 1956 لەگەڵ دروستبوونی یانەی ھەولێر دروستکراوە و لە کۆتای ساڵی 2001 بەناوی شەھید “فەڕەنسۆ ھەریری” کراوە.
