مەسعود بارزانی، سەرۆکی پارتی لەگەڵ فراکسیۆنی حزبەکەی لە خولی پێنجەمی پەرلەمانی کوردستان-عێراق کۆبووەوە و رایگەیاند، پێویستە پارتی پارێزەری بەرژەوەندییەکانی خەڵکی کوردستان و فەرهەنگ و رەوشتی بەرزی کۆمەڵگەی کوردستانی بێت.
بارەگای بارزانی لە راگەیەندراوێکدا بڵاویکردەوە، پێشنیوەڕۆی ئەمڕۆ شەممە مەسعود بارزانی لەگەڵ فڕاکسیۆنی پارتی لە پەرلەمانی کوردستان کۆبووەوە و “سوپاسی ڕۆڵ و ماندوبونی ئەندامانی فڕاکسیۆنی پارتی کرد و دەستخۆشی لێکردن کە لەم خولەی پەرلەمانی کوردستاندا کارەکانی خۆیان بە باشی بەجێگەیاندوە و پابەندی ئەرکەکانیان بون”.
لە راگەیەندراوەکەدا هاتووە، بارزانی “داوای کرد بەردەوام بن لە ڕۆڵی خۆیان لە بوارە جیاجیاکان و خزمەتی کوردستان و پارتی بکەن”، جەختیشی لەوە کردەوە کە “پارتی ئومێدی سەرەکیی خەڵکی کوردستانە و پێویستە پارتی پارێزەری بەرژەوەندییەکانی خەڵکی کوردستان و فەرهەنگ و ڕەوشتی بەرزی کۆمەڵگەی کوردستانی بێت”.