دوای سەردانی حەیان عەبدولغەنی، وەزیری نەوتی عێراق بۆ ئەنقەرە لە بارەی پرسی نەوت، نرخی نەوت دابەزینی بەخۆوە بینی.
لەبازاڕەكانی جیهان ئەمڕۆ سێشەممە نەوت دابەزینی بەخۆیەوە بینی لە كاتێكدا بازاڕ چاوەڕێی ئەوە دەكات، هەناردەكردنی نەوتی هەرێمی كوردستان دەستپێدەكاتەوە یان نا.
ئەگەری دووبارە دەستپێکردنەوەی هەناردەی نەوت دەتوانێت رێژەی خستنەڕووی نەوت زیاد بكات كە بەهۆی كەمكردنەوەی ئۆپێك+ەوە كەمكراوەتەوە.
بەگوێرەی بۆرسەی جیهانی وزە، ئەمڕۆ نرخی بەرمیلێك نەوتی خاوی برێنت هەشت سەنت دابەزی و گەیشتە 84.38 دۆلار، هەروەها نەوتی خاوی ئەمریكای ڕۆژئاوای تەكساس ئینتەرمیدیت بە حەوت سەنت دابەزی و گەیشتە 80.65 دۆلار.
دوێنێ شەو حەیان عەبدولغەنی گەیشتە ئەنقەرەی پایتەختی توركیا بۆ تاوتوێكردنی چەند پرسێك لەوانە دەستپێكردنەوەی هەناردەكردنی نەوت لە ڕێگەی بەندەری نەوتی جەیهانەوە.
