وەزیری دارایی و ئابووریی حکوومەتی هەرێم ئاشکرای کرد، چەند مانگێکە نەوت ناڕوات و داهاتی ناوخۆش بەشی مووچە ناکات، بۆیە پێویستە لەمەودوا پرسیاری مووچە ئاڕاستەی وەزارەتی دارایی عێراق بكرێت.
ئاوات شێخ جەناب، وەزیری دارایی و ئابووریی حکوومەتی هەرێم، لە کۆنگرەیەکی ڕۆژنامەوانیدا ڕایگەیاند: “هەموو ئەو داخوازییانەی کە لەسەر هەرێمی کوردستان هەبووە بەرامبەر بەغدا جێبەجێ کراوە و بڕیارە کۆبوونەوەیەکی دیکە لە بەغدا بکرێت و هیوادارین ئەنجامەکان بەدڵی هەمووان بێت.”
وه‌زیری دارایی وتیشی: “ئەو داواکاری و داتا و شتانەی کە بەغدا لە ئێمەی داوا دەکات، پێم وا نیە لای خۆیان جێبەجێ کرابێت، لە ساڵی 2013-وە حکوومەتی عێراق ئابڵۆقەی خستووەتە سەر هەرێمی کوردستان و ئومێدەوارین ئەو ئابڵۆقەیە هەڵبگرێت و بودجە جێبەجی بکرێت و شایستەی کوردستان بنێرن.”
لەبارەی دابەشکردنی مووچەوە، ئاوات شێخ جەناب وتی: ”چەند مانگێکە نەوت ناڕوات و داهاتی ناوخۆش بەشی مووچە ناکات، بۆیە پێویستە لەمەودوا پرسیاری مووچە ئاڕاستەی وەزارەتی دارایی عێراق بكرێ.”
