نێردەی نەتەوەیەکگرتووەکان لە عێراق و سەرۆکی پەرلەمانی کوردستان-عێراق کۆبوونەوە و پرسی هەڵبژاردنی “پەرلەمانی کوردستانیان” تاوتوێکرد، رێواز فایەق دەڵێت، “دەبێت پێش تەواوبوونی ئەو ماوەیەی درێژکراوەتەوە، هەڵبژاردن ئەنجامبدرێت“.
ئەمڕۆ (یەکشەممە 30ـی تشرینی یەکەم 2022) ماڵپەری پەرلەمانی کوردستان-عێراق بڵاویكرده‌وه، رێواز فایەق سەرۆکی پەرلەمانی کوردستان، لە کۆبوونەوەیدا لەگەڵ جینین هێنس پلاسخارت، نوێنه‌ری تایبه‌تی سكرتێری گشتیی نه‌ته‌وه‌یه‌كگرتووه‌كان له عێراق، لەبارەی ئەنجامدانی هەڵبژاردنی پەرلەمان وتوویەتی، “ده‌بێت رێكاره یاسایی، ته‌كنیكی و كارگێڕییه‌كان، بۆ ئه‌نجامدانی هه‌ڵبژاردن، پێش ته‌واوبوونی ئه‌و ماوه‌یه‌ی كه درێژكراوه‌ته‌وه ته‌واو بكرێن و ھەڵبژاردنیش ئەنجامبدرێت”.
سه‌باره‌ت به هۆکاری ئەنجامنەدانی هەڵبژاردن له واده‌ی خۆیدا، رێواز فایەق ئاماژه‌ی به‌وه‌كردووه، “دۆخی ناسه‌قامگیر و نه‌خوازراوی عێراق به‌هۆی ناكۆكی نێوان لایه‌نه سیاسییه‌كان، هه‌روه‌ها دواكه‌وتنی پێكهێنانی كابینه‌ی نوێی حكومه‌تی عێراقی فیدڕاڵ، كاریگه‌ری زۆری هه‌بوو له‌سه‌ر دواخستنی هه‌ڵبژاردنه‌كان، هاوكات بابه‌تی نوێكردنه‌وه‌ی تۆماری ده‌نگده‌ران، هه‌مواركردنه‌وه‌ی یاسای هه‌ڵبژاردن و كاراكردنه‌وه‌ی كۆمیسیۆنیش، به‌شێكبوون له ئاڵنگارییه‌كان”.
سەرۆکی پەرلەمان ئه‌وه‌شی خسته‌ڕوو، بەگوێرەی یاسای بەردەوامبوونی خولی پێنجەمی پەرلەمانی کوردستان، “ده‌بێت رێكاره یاسایی، ته‌كنیكی و كارگێڕییه‌كان، بۆ ئه‌نجامدانی هه‌ڵبژاردن پێش ته‌واوبوونی ئه‌و ماوه‌یه‌ی كه درێژكراوه‌ته‌وه، ته‌واو بكرێت و ھەڵبژاردنیش ئەنجام بدرێت”.
هەر بە گوێرەی راگەیەندراوەکەی پەرلەمانی کوردستان-عێراق، نوێنه‌ری تایبه‌تی سكرتێری گشتی نه‌ته‌وه‌یه‌كگرتووه‌كان له عێراق پشتیوانی خۆی بۆ هه‌نگاوه‌كانی په‌رله‌مانی كوردستان ده‌ربڕی و ئامادەیی نیشانداوە بۆ لێكنزیككردنەوەی لایەنەكان بۆ گەیشتن بە رێككەوتن.
هەفتەیەکی داهاتوو، ماوەی چوار ساڵی کارکردنی خولی پێنجەمی پەرلەمانی کوردستان-عێراق کۆتایی دێت، بەڵام بەهۆی کێشەکانی (کۆمیسیۆن و ناکۆکی نێوان لایەنە سیاسییەکان لەسەر یاسای هەڵبژاردن)، نەتواندرا لە وادەی دیاریکراودا هەڵبژاردن بەڕێوەبچێت، رۆژی 9ی تشرینی یەکەم/ئۆكتۆبه‌ری 2022، پەرلەمانی کوردستان بە دەنگی 80 پەرلەمانتار، پێشنیازە یاسایەکی پەسەندکرد، کە رێگە بە درێژکردنەوەی ماوەی خولی پێنجەمی پەرلەمان دەدات، بۆئەوەی تا کۆتایی ساڵی 2023 لە کارەکانی بەردەوام بێت.
1
مەرجەکانی وەرگرتن لە کولێژی سەربازی ئاشکرا دەکرێت
2
خشتەی تاقیکردنەوەی نیشتمانی بۆ پۆلی 9ـی بنەرەتی راگەیەندرا
3
وەزارەتی خوێندنی باڵا رێنمایی بۆ خوێندنی دیپلۆمی باڵا، ماستەر و دکتۆرا دەردەکات
4
“ژیانی کەم ئەندامان لە کوردستان یەکسانە بە دۆزەخ”
5
یەکەم تابلۆی ئۆتۆمبێل لەسەر سیستەمی نوێ لە سلێمانی چاپ کرا
