وەزیری پێشمەرگە لەگەڵ شاندێکی باڵای دیپلۆماتی و سەربازیی ئەمریکا کۆبووەوە

0

لایک

0

شۆڕش ئیسماعیل، وەزیری پێشمەرگەی ھەرێمی کوردستان پێشوازیی کرد لە شاندێکی باڵای دیپلۆماتی و سەربازیی ئەمریکا.

بەگوێرەی ئەو راگەیەندراوەی کە لە وەزارەتی پێشمەرگەی ھەرێمی کوردستانەوە بڵاوکراوەتەوە، شۆرش ئیسماعیل، پێشوازی کرد لە شاندێکی باڵای دیپلۆماتی و سەربازی ئەمریکا بە سەرۆکایەتیی دینا سترۆل، جێگری یاریدەدەری وەزیری بەرگریی ئەمریکا بۆ کاروباری رۆژھەڵاتی ناوەڕاست و ماتیو تولەر باڵیۆزی ئەمریکا لە عێراق و ماتیو ترۆلینگەر، جێگری بەڕێوەبەری کاروباری سیاسیی و سەربازیی لە ھێزە ھاوبەشەکانی ئەمریکا لە رۆژھەڵاتی ناوەڕاست و جەنەراڵ فلیپس و کۆلۆنێل دۆگڵاس لە ئۆفیسی ھەماھەنگی کاروباری ئاسایشی ئەمریکا لە عێراق و ھەرێمی کوردستان.

بە پێی راگەیەندراوەکە لە کۆبونەوەیەکدا، کە فەریق جەمال محەمەد، سەرۆکی ئەرکان و راوێژکارانی باڵای سەربازیی و بەڕێوەبەری ھەماھەنگی و پەیوەندییەکان ئامادەی بوون، مەترسییەکانی داعش، رۆڵی ھێزی پێشمەرگە و سوپای عێراق، پشتگیری و ھاوکارییەکانی ئەمریکا و ھاوپەیمانان و چاکسازییەکانی وەزارەتی پێشمەرگە و دۆخی سیاسی و سەربازی عێراق و ھەرێم و ناوچەکە تاوتوێكراون.

لە کۆبوونەوەکەدا دینا سترۆل، جێگری یاریدەدەری وەزیری بەرگریی ئەمریکا بۆ کاروباری رۆژھەڵاتی ناوەڕاست سڵاوی ڵۆید ئۆستنی، وەزیری بەرگریی ئەمریکا، بە شۆڕش ئیسماعیل و ھێزەکانی پێشمەرگە گەیاندووه‌ و ستایشی ھێزی پێشمەرگەی کردووه‌ لە پاراستنی ئاسایش و ئارامی ناوچەکەو جەختی کردووه‌تەوە لە پشتگیریی سیاسی و سەربازیی ئەمریکا بۆ عێراق و ھەرێمی کوردستان و برەودانی زیاتر بە کاری پێکەوەیی و ھاریکاریی ھاوبەشی نێوانیان.

ھەر لە کۆبونەوەکەدا، مەترسییەکانی تیرۆریستان و چالاکی و جموجۆڵ و پەلامارەکانی داعش لە ناوچە جیاکانی عێراق و سووریا، گفتوگۆی ورد و ھەمەلایەنەی لەسەر کراوه‌. لەمبارەیەوە ھەردوولا جەختیان لە گرنگیی ھاریکاری و ھەماھەنگیی نێوان پێشمەرگە و سوپای عێراق کردووه‌تەوە تا بە پشتگیریی ھاوپەیمانیی نێودەوڵەتی، بەرەنگاری ئەو مەترسییانە ببنەوە.

لای خۆیەوە، وەزیری پێشمەرگە رایگەیاندووه‌ “لە قۆناغی ئێستای مەترسییەکانی تیرۆریستانی داعش و رووبەڕووبونەوەیان، پێویستیمان بە ‌ھاوکاری و ھەماھەنگی ھەمووان ھەیە. سوپاسی ھێزەکانی ئەمریکا دەکەین لە یارمەتییە بەردەوامەکانیان بۆ ھێزی پێشمەرگە لەپێناو پاراستنی ئاسایش و ئارامی ناوچەکە و تێکشکاندنی تەواوەتی تیرۆریستان”.

بەشێکی دیکەی کۆبونەوەکەدا، تاوتوێکردنی پڕۆسەی چاکسازی وەزارەتی پێشمەرگە بوو، وەزیری پێشمەرگە دووپاتیکردووه‌تەوە، بە ھاوکاری ئەمریکا و ھاوپەیمانان وەزارەتی پێشمەرگە لە پرسی چاکسازی قۆناغی باشی بڕیوە، لە یەکخستن و رێکخستنەوەی ھێزەکانیش ھەنگاوی زۆر باش چووەتە پێشەوە. وتیشی “بەردەوام دەبین و خواست و تموحی گەورەترمان ھەیە”.

لای خۆیەوە دینا سترۆل، پاڵپشتی و پشتگیری وڵاتەکەی بۆ رێفۆرمی سەربازیی و بنیاتنانی ھێزێکی تۆکمەی سەربازییانەی سەردەمی بۆ پێشمەرگە دووپاتکردەوە و راشیگەیاند “لەگەڵ پێشمەرگە و ھاوبەشەکانمان لە عێراق، بەردەوام دەبین، خواستی ئەمریکا مانەوەی ناوچەکەیە بەئارامی و لەناوبردنی تیرۆر و تیرۆریستانە”.

‌پرسی پەیوەندییەکانی پێشمەرگە لەگەڵ وەزارەتی بەرگریی و سوپای عێراق و پێکھێنانی دوو لیوای ھاوبەشی نێوان ھەردوولا، بەشێکی دیکەی گفتوگۆکانی کۆبونەوەکە بوو، تیایدا ھەردوولا بە بایەخەوە لێکتێگەیشتن و نزیکبوونەوەی نێوان پێشمەرگە و سوپای عێراق بەگرنگ و کاریگەر لەقەڵەمدا، لەلایەن خۆشیانەوە وەفدی باڵای دیپلۆماتی و سەربازیی ئەمریکا دووپاتیانکردەوە بۆ گەیشتن بە رێککەوتنی کۆتایی ھەوڵە دیپلۆماتییەکانی خۆیان دەخەنە گەڕ، کە ئەو ھەنگاوانە لە ئەرک بینینی لیوا ھاوبەشەکان بەکردەیی بچنە بواری جێبەجێکردن لە پێناو پڕکردنەوەی ئاسایش و سەقامگیریی لە عێراق و ناوچەکەدا.