نێچیرڤان بارزانی، سەرۆکی هەرێمی کوردستانی عێراق لە شاری سلێمانی بەشداریی لە پرسەی قوربانییانی رووداوی تەقینەوەکەی شەوی پێنجشەممەی شارەکە دەکات کە تیایدا 15 کەس گیانیان لەدەستدا و 12 کەسی دیکەیش بریندار بوون.
دڵشاد شەهاب، راوێژکاری سەرۆکی هەرێمی کوردستان هەواڵی سەردانی نێچیرڤان بارزانی بۆ سلێمانی پشتڕاستکردەوە و رایگەیاند، نێچیرڤان بارزانی پاش نیوەڕۆی ئەمڕۆ بەشداریی لە پرسەی قوربانییانی رووداوی تەقینەوەکەی سلێمانی دەکات.
بڕیارە ئەمڕۆ بە ئامادەبوونی هەزاران کەس و لە رێوڕەسمێکدا تەرمی 14 کەسی تەقینەوەکەی سلێمانی بە خاک بسپێردرێن.
جەعفەر شێخ مستەفا، جێگری سەرۆکی هەرێم بە نوێنەرایەتیی نێچیرڤان بارزانی بەشداریی رێوڕەسمەکەیە و بڕیارە دوای نیوەڕۆی ئەمڕۆ سەرۆکی هەرێم خۆی بگاتە شاری سلێمانی و بەشداریی پرسەکە بکات.
ئێوارەی پێنجشەممەی رابردوو تەقینەوەیەکی بەهێز لە ماڵێکدا لە گەڕەکی کازیوەی شاری سلێمانی روویدا و لە ئەنجامدا 15 کەس گیانیان لەدەستدا و 12 کەسی دیکەیش بریندار بوون.