ئەمڕۆ یەکشەممە 12-02-2023، مەسرور بارزانی، سەرۆکی حکومەتی هەرێم لە شاری دوبەی لە ئیمارات, لەگەڵ شێخ محەمەد بن راشد ئال مەکتووم، جێگری سەرۆکی دەوڵەتی ئیمارات و سەرۆکی ئەنجومەنی وەزیران و حاکمی میرنشینی دوبەی كۆبووەوە.
بەگوێرەی راگەیەندراوێکی حکومەتی هەرێم، لە کۆبوونەوەکەدا کە شێخ حەمدان بن محەمەد بن راشد، جێنشینی دوبەی و ژمارەیەکی دیکەی بەرپرسانی باڵای ئیمارات ئامادەی بوون، برەودان بە پەیوەندییەکانی هەرێم و ئیمارات تاوتوێ کرا.
ئەوەش هاتووە، سەرۆکی حکومەت سوپاسی پشتیوانیی بەردەوامی دەوڵەتی ئیماراتی لە چاکسازییەکانی حکومەتی هەرێم کرد، بە تایبەتی لە بواری ئاڵۆگۆڕی بازرگانی و وەبەرهێنان.
لەلای خۆیەوە شێخ محەمەد بن راشد، خۆشحاڵی خۆی بە سەردانی شاندی هەرێم دەربڕی و خواستی پەرەپێدانی پەیوەندیی دوولایەنەی لە هەموو بوارەکاندا دووپاتکردەوە.