فەریق روکن عەلی فریجی، فەرماندەی ئۆپەراسیۆنەکانی کەرکوک لە پەیامێکدا کە ئاڕاستەی هاووڵاتییانی شاری کەرکوکی کردووە تیایدا رایگەیاندووە، هێزە ئەمنییەکانمان لە خزمەتی هاووڵاتیانی شاری کەرکوک دەمێننەوە.
دەقی پەیامەکەی فریجی:
هەموو هاووڵاتیانی شاری کەرکوک دڵنیا دەکەینەوە، هێزەکانمان لە خزمەتی هەموو هاووڵاتیاندا دەمێننەوە و بەردەوامیی بە ئەرکەکانیان دەدەن.
سەرپەرشتیکردنی شەقامی پارێزگاکە بەبڵاوەپێکردنی دەزگا ئەمنییەکان و پاراستنی هاووڵاتییانی کەرکوک و وەستان شانبەشانی یەکتر شەرەفێکی گەورەیە بۆ ئێمە، هەروەها جەخت لەوە دەکەینەوە کە ئەرک و ماندوبوونمان لەپێناو سەپاندنی ئەمن و ئاسایش لە پارێزگاکە ئامانجی سەرەکیمانە.
دووبارە لێرەوە سوپاسی برایانمان لە رەوتی سەدر و چوارچێوەی هەماهەنگی دەکەین لە بۆ یارمەتییەکانیان، سوپاسی هاونیشتمانیانی کەرکوک دەکەین.
کەرکوک هەمووکات ئەمنییەت و ئاسایشی خۆی دەپارێزێت و شانازی بە هاووڵاتی، سیمبۆڵ و مێژووەکەیەوە دەکات.