ئەمڕۆ یەكشەممە 24ـی نیسانی 2022، نێچیرڤان بارزانی، سەرۆكی هەرێمی كوردستانی عێراق لە 48ـەمین ساڵیادی شەهیدانی زانكۆی سلێمانی و بۆردومانكردنی شاری قەڵادزێ پەیامێكی لە هەژماری فەرمی خۆی لە تویتەر بڵاوكردەوە.
دەقی پەیامەكەی نێچیرڤان بارزانی:
بەڕێز و شكۆوە یادی شەهیدانی زانكۆی سلێمانی و هاووڵاتییانی خۆشەویستی قەڵادزێ دەكەینەوە كە بەر لە 48 ساڵ وەک ئەمڕۆ، 1974/4/24 لە بۆمبارانێكی دڕندانەی فڕۆكە جەنگییەكانی رژێمی ئەوسای عێراقدا شەهید بوون. سڵاو و دروود لە گیانی پاكیان، یادیان هەمیشە بەخێر.
هاوکات، مەسرور بارزانی، سەرۆکی حکومەتی هەرێم لە پەیامەکەیدا بەبۆنەی ساڵیادی بۆردومانکردنی قەلادزێ لەلایەن دەسەڵاتی ئەوسای عێراق، پەیامێکی بڵاوکردەوە.
دەقی پەیامەکەی مەسرور بارزانی:
سەری رێز و نەوازش دادەنوێنین بۆ گیانی پاکی شەهیدانی هەردوو کارەساتی بۆردومانکردنی شاری قەڵادزێ و گوللـەبارانکردنی خۆپێشاندانێكی سڤیل لەلایەن رژێمی بەعسەوە.
لێرهدا دووباره داوا لە حكومەتی عێراق دەکەین زیانلێکەوتووانی دەستی رژێمی پێشوو قەرەبوو بكاتهوه.