سەدر یەکێک لە سەرکردەکانی رەوتەکەی دەردەکات
موقتەدا سەدر، رێبەری رەوتی سەدر بەتۆمەتی بەکارهێنانی ناوی رەوتی سەدر بۆ راییکردنی کاروباری حکومی، کەسی و بازرگانی، سەرکردەیەکی رەوتەکەی بەناوی ئەحمەد ئەلعقیلی لەناو رەوتی سەدر دەرکرد.
بەگوێرەی نوسراوێک کە نووسینگەی موقتەدا سەدر، رێبەری رەوتی سەدر ئەمڕۆ بڵاویکردەوە و تیایدا هاتووە، ئەحمەد ئەلعقیلی ناوی رەوتی سەدری بۆ بەشداریکردن لە کاروباری حکومەت، دامەزراوە فەرمییەکان، کاروباری ئابووری، بازرگانی و کەسی بەکارهێناوە.
ئەوەشی خستووەتەڕوو، دوای ئەوەی بەڵگەی تەواوی لەسەر دەرکەوتووە کە ناوی رەوتی سەدری بۆ مەبەستی کەسی خۆی بەکارهێناوە، بۆیە بڕیاردراوە بە دەرکردنی ناوبراو لە رەوتەکەیان و گرتنەبەری هەموو رێکارێکی یاسایی و کارگێڕی بەرامبەری.