سوودانی روونکردنەوە لەسەر دەستکاریکردنی بەهای دۆلار بەرامبەر دینار دەدات
سەرۆکوەزیرانی عێراق لەبارەی دەستکاریکردنی بەهای دۆلار بەرامبەر دینار و ئامادەکردنی پڕۆژەیاسای بودجە روونکردنەوە دەدات و، رایدەگەیەنێن، "پابەندی بڕیاری بانکی ناوەندیی عێراقین".
بانکی ناوەندیی عێراق، لە 20ـی کانوونی یەکەمی 2020ـدا بڕیاریدا، نرخی فرۆشتنی هەر دۆلارێکی ئەمریکی لە 1180 دینارەوە بۆ 1460 دینار زیاد بکات، ئەو بڕیارە هەرچەندە بووەهۆی زیادبوونی داهاتی ناوخۆیی، بەڵام لە هەمانکاتدا نرخی زۆربەی خۆراک و کەلوپەلی لە بازاڕەکاندا لانیکەم بە رێژەی زیاتر لە 20٪ بەرزکردەوە.
سەبارەت بە دەستکاریکردنی بەهای دۆلار بەرامبەر دیناری عێراق، محەمەد شیاع سوودانی وتی، "قسە و لێدوان لەسەر ئەو بابەتە دراون، لە نێوەندی میدیایی و سیاسی و کۆمەڵایەتیدا بەڵام جەختی لەسەر دوو بنەمای سەرەکی کردەوە ئەوانیش:
یەکەم: ئەم حکومەتە پابەندە بە جێبەجێکردنی یاساکان و یاسا پێشێل ناکات. یاسای بانکی ناوەندی دەسەڵاتی داوەتە ئەم دامەزراوەیە لە داڕشتنی سیاسەتی دراو، بۆیە پابەندین بە سیاسەت و بڕیارەکانی بانکی ناوەندی. پارێزگاری و پشتیوانی لە سەربەخۆیی بانکی ناوەندی دەکەین کە تاکە لایەنی پەیوەندیداری ئەو بابەتەیە.
دووەم: بابەتێکی دیکە، لە بڕیاری پێشووی گۆڕانکاری لە بەهای دراو، رێکاری پاراستنی چینی هەژاران و مامناوەند و داهاتی سنووردار نەگیراوەتەبەر. ئەمە کێشەکەی کەڵەکە کردووە و کاردانەوەی نەرێنی لەسەر هاووڵاتییان لێکەوتووەتەوە. وەک حکومەت پابەندن بە رێکار و بڕیار بۆ ئەو چینانە. لە داهاتوویەکی زۆر نزیکدا ئەو بڕیارانە دەردەکەن، تاکو باری سەرشانی هاووڵاتییان کەم ببێتەوە.